Budvanski vatrogasci uspjeli su sinoć oko 20 časova da spriječe tragediju u gradskom naselju Babilonija kada je četvorogodišnja djevojčica, ruska državljanka,  umalo pala  sa terase sa četvrtog sprata, prenose Vijesti.

Stanari zgrade “Merkur“, kod Druge osnovne škole,  čuli su vrisak i zapomaganje djeteta, koje je bilo zaključano u stanu. 

Djevojčicu je, kako se kasnije ispostavilo, majka ostavila u stanu i otišla kod frizera. 

Dijete se uznemirilo, počelo da plače i vrišti, da bi  nakon toga izašlo na terasu i  popelo se na  ogradu. Komšije su bezuspješno pokušali da smire djevojčicu. U pomoć su pozvali pripadnike Službe zaštite i spasavanja. Djevojčica je praktično  prešla sa druge strane ograde, kad su vatrogasci stigli. Sa njima su stigli i pripadnici policije.

Jedna ekipa vatrogasaca došla je na terasu susjednog stana i počeli su da pričaju sa djevojčicom, kako bi je smirili. Za to vrijeme druga ekipa vatrogasaca je došla do stana i počela sa obijanjem blindiranih vrata. 

Dok je djevojčica polako dolazila k sebi, počevši da priča sa vatrogascima, na vratima stana  pojavila se majka.