Primijetili su ga komšije u kasnim večernjim satima, nakon što su ga satima tražili roditelji, porodica i policija, prenosi portal Barinfo.

Nikolaj se poslije nastave koju pohađa u šušanjskoj školi „Anto Đedović“ nije vratio kući, pa su roditelji najprije kontaktirali njegove drugove, zatim obišli školu i sve lokalitete gdje obično dječak boravi i šeta: Šušanj, cio Zeleni pojas... Kako ga nisu našli do popodnevnih sati, nestanak su prijavili policiji, pretražili kompletnu obalu od Crvene plaže do Topolice, a u večernjim satima, nakon što je pao mrak, obavijestili lokalne medije Radio Bar i Bar Info da pomognu u potrazi.
 
Razgovor sa malim bjeguncem je otkrio roditeljima da nije dolazio u školu pune dvije nedjelje. Odlazio je od kuće obučen u školsku uniformu, spakovanih knjiga i sendviča, i vraćao se u uobičajeno vrijeme, ali u učionicu nije ulazio. Kako je rekao roditeljima, popustio je u nastavi, nije više nizao petice i „bilo mu je bez veze da više ide“, pa je napravio tri skloništa u šumici i šipražju blizu škole, i tu boravio dok su njegovi drugari bili na času.
 
Pošto je sve zanimalo šta je radio za vrijeme kiša, kojih je bilo u proteklih 14 dana, Nikolaj je objasnio kako je od dasaka napravio strehu u jednom od skloništa, „onom za kišne dane“, slijedeći uputstva iz enciklopedija. Sebi je napravio i odmorište, nosio je knjige koje su ga interesovale, hranu i vodu, a imao je uvid u to kad njegovi vršnjaci završavaju čas, ne bi li se na vrijeme vratio doma. Kako kaže, uživao je u tišini, pticama koje su cvrkutale, mravima, kornjačama...
 
A juče je jednostavno – zaspao. Kad se probudio, vidio je da je vrijeme za dolazak kući odavno prošlo, pa se zabrinuo kako će roditelji reagovati. Odlučio je da se, kad padne veče, sakrije u zavučenom ćošku dvorišta, prespava na starom krevetu i pojavi ujutro kad „mamu i tatu prođe ljutina“.
 
Alekseja, Nikolajevog oca čudi zašto niko iz škole nije nazvao kad su vidjeli da dječaka nema dvije nedjelje na nastavi.

"Rekli su da nisu imali broj telefona, a moje dvoje starije djece je pohađalo tu školu. No, ne zamjeram, dešava se. Moram da istaknem brzo i profesionalno reagovanje policije, i barske medije koji su nam izašli u susret, shvativši našu dramu i paniku“, zaključuje otac dječaka koji je juče uzbunio Bar. 

 Nikolaj Palitsyn/Foto:barinfo.me