Do početka ABA lige ostalo je više od mjesec dana, ali bi uskoro moglo da bude poznato hoće li takmičenje započeti i ekipa Zadra. Naime, danas je jedan od čelnih ljudi ABA lige Roman Lisac, za zadarski portal "Zdnews" izjavio kako klubu prijeti izbacivanje iz regionalnog takmičenja.

Kako je Lisac pojasnio u intervjuu, radi se o kašnjenju s plaćanjem pozivnice za prošlu sezonu.

"Kako sada stvari stoje, dug još uvijek nije podmiren i nema naznaka da će se isti ubrzo rješavati. Mene ne zanima politika, mislim da je Zadranima i navijačima u Zadru košarka jako važna da bi se neko igrao s tim stvarima. Ukoliko KK Zadar vrlo brzo ne podmiri sva svoja dugovanja, taj klub, nažalost, neće imati pravo nastupa u ABA Ligi ove godine. Ako mislite da se šalim, molim da me vrlo ozbiljno shvate. Iza svojih riječi odgovorno stojim. Zadar je grad košarke koji diše svim svojim bićem za košarku”, poručio je Lisac.

U razgovoru za isti portal, direktor Zadra Boris Skroče izjavio je kako se radi na rješavanju problema.

“Mi smo u stalnom kontaktu s vođstvom ABA Lige i radimo na tome da se naša dugovanja riješe. Pozivnica koju lani nijesmo platili, a dug je ostao, ne košta 100 hiljada nego nešto manje. Ne mogu vam reći s kim sam se sastao, ali mogu kazati kako radimo na problemu”, kazao je Skroče.

Zadrani još uvek nijesu izmirili dugovanja iz prethodne sezone, a u novoj su ponovo dobili pozivnicu za takmičenje koja se plaća 150 hiljada eura.

Podsjetimo, novosadska Vojvodina je ostala bez učešća u ABA ligi jer nije bila u poziciji da odjednom uplati kompletan iznos kotizacije za timove koji dobiju vajld-kard. (RTCG)