“Mali dio karaktera je urođen. Ipak najveći dio je stečen vaspitanjem. Vaspitni stilovi, metode i uticaj porodičnog okruženja najvažniji su za razvoj i oblikovanje djeteta. Roditelji su primarni odgajatelji djetetu te svojim razmišljanjima, djelima, postupcima i komunikacijom uvelike utiču na njegovu budućnost”, pojašnjava Lana Kihas, stručnjak iz oblasti ranog i predškolskog vaspitanja i obrazovanja, prenosi 24sata.hr.

Djetetova genetika, nastavlja Kihas, rezultat je genetike njegovih roditelja. Na svijet dolazimo s nasljeđem, no potrebno nam je iskustvo da bi se izgradili kao osobe. Premda je genetika vrlo komplikovana i kompleksna, ipak postoje pravila prema kojima se mogu neke stvari s relativnom sigurnošću predvidjeti. Kad se radi o nasljeđivanju gena za visinu, tata ima dominantniju ulogu. Ako je tata visok, i dijete će biti visoko.

A gen za debljanje prenose majke. Kod boje kose glavnu ulogu imaće dominantni majčin gen za boju i strukturu kose.

Takođe, gen koji je odgovoran za gubitak kose dolazi s majčine strane. Drugim riječima, muškarci za ćelavost mogu zahvaliti svojim majkama, kaže ona.

Jedna od šarmantnijih stvari na ljudima su rupice na obrazima. Rupice imaju veze sa strukturom lica, ali to je svakako dominantni gen koji dolazi od tate, kao i struktura zuba. Naime, tatini geni za nasljeđivanje strukture zubi su dominantniji, što znači da, ako tata ima velike zube, i dijete će u odrasloj dobi imati vrlo slične zube.

Majčini geni presudni su za način na koji će dijete spavati te hoće li se često okretati u snu, a genetičari su zaključili i da veliki nožni palac nasljeđujemo s mamine strane. Baš kao i brzinu starenja. Naime, naupčnici su otkrili DNK iz mitohondrija koji nasljeđujemo isključivo od mame, a može djelomično kontrolisati starenje. S druge strane, velike uši i oblik nosa nasljeđuju se po muškoj liniji.

I za sklonost bolestima krivi su geni, a neki koje dijete dobija od oca mogu povećati vjerovatnost za srčane probleme za 50 odsto, a arterije mogu biti podložnije začepljenju. Takođe, muškarci koji su imali problema s neplodnošću često imaju sinove s istim problemom, a i mentalni problemi češće se prenose s oca na sina.

Osobine koje se prenose dominantnim genima su spojene ili guste obrve, rupica na bradi, sposobnost da se uvrne jezik, široka ušna resica, bijeli pramen, koji češće imaju muškarci, tamna koža, debele usnice te široka brada. Recesivni geni su svijetla ili crvena kosa, ljevorukost, plave ili sive oči te svijetla put, piše Radio Sarajevo.

Otac

Od oca će dijete vjerovatno naslijediti visinu, rupice na obrazima, oblik i strukturu zubi, velike uši, oblik nosa, punije usne, srčane probleme, neplodnost, dominantnu ruku.

Majka

Majčini geni odgovorni su za boju i strukturu kose, sklonost ćelavosti, oblik nožnog palca, brzinu starenja, daltonizam, inteligenciju, obrasce spavanja, debljanje, hemofiliju.